AZADİNFORM. Dünən Xocalı soyqırımı ilə bağlı İsveç Parlamentində nəzərdə tutulmuş vacib görüşlər reallaşıb. “Azadinform” xəbər verir ki, görüşlərdə Milli Məclisin İsveçdə fəaliyyət göstərən Azərbaycan Naminə Cəmiyyətinin sədri Nadir Hollenbrand və Türk Federasiyasının sədri Həsən Dölek tərəfindən İsveçə dəvət olunmuş deputatlar Elton Məmmədov və Elman Məmmədov da iştirak edib. 

İsveç parlamentinin vitse-spikeri Ulf Holmun başçılıq etdiyi Riksdaq rəsmiləri ilə görüşdə iştirakçılara Xocalı faciəsinin tarixi və təfərrüatları ilə bağlı geniş məlumat verilib. Qonaqlara Azərbaycan parlamentarilərinin apardığı soyqırımla bağlı məlumatlar olan CD-lər və ingilis dilində nəşr olunmuş kitablar təqdim olunub.

Faciə ilə bağlı videolenti izləyən İsveç rəsmiləri millət vəkilləri və İsveçdəki diaspor sədrlərinə Xocalı faciəsi ilə bağlı daha genişmiqyaslı tədbirlərin görülməsində daim dəstək olacaqlarını bildiriblər. Rəsmi görüşlərdən sonra millət vəkilləri və diaspor nümayəndələri İsveçdəki ən böyük məscidi ziyarət edərək, Xocalı qurbanlarının xatirəsinə dualar edib.

AZADİNFORM. Azərbaycan Respublikasının Avropa Şurası yanında Daimi Nümayəndəliyi tərəfindən Azərbaycan və Türk diaspor təşkilatlarının, Avropa Şurası yanında və Strasburqda akkreditə olunmuş diplomatik korpusun nümayəndələrinin, Strasburq universitetində təhsil alan azərbaycanlı və əcnəbi tələbələrin, eləcə də Elzas regionunda yaşayan soydaşlarımızın iştirakı ilə XX əsrin ən dəhşətli faciələrindən biri olan Xocalı soyqırımının 21-ci ildönümünə həsr olunmuş anım mərasimi keçirilib. “Azadinform” xəbər verir ki, tədbirdə çıxış edən Daimi nümayəndə Emin Eyyubov ermənilərin xalqımıza qarşı törətdikləri soyqırımı, insanlıq tarixinin ən dəhşətli cinayətlərindən biri olan Xocalı soyqırımının əsl mahiyyəti barədə danışıb. Bu xüsusda, Heydər Əliyev Fondunun Azərbaycan həqiqətləri, o cümlədən Xocalı soyqırımı barədə dünya və Avropa ictimaiyyətinə ətraflı və düzgün məlumat vermək sahəsində apardığı işləri diqqətə çatdırılıb, “Xocalıya Ədalət” kampaniyasının əhəmiyyəti xüsusi qeyd olunub.

Daimi nümayəndə habelə, Xocalı soyqırımının bir çox dövlətlər tərəfindən tanındığını diqqətə çatdırmış və bu istiqamətdə səylərin bundan sonra da davam etdiriləcəyini vurğulanın. 

AZADİNFORM. “Müstəqil Azərbaycanın kosmik sənaye texnologiyaları sahəsində ilk addımlarını atır. Vaxtilə keçmiş İttifaqın kosmik sənayedə əldə etdiyi uğurlarda Azərbaycanın da rolu olub.” “Azadinform” xəbər verir ki, bu barədə rabitə və informasiyalar texnologiyaları naziri Əli Abbasov Bakıda Azərbaycan-Yaponiya peyk sektoruna həsr olunmuş seminarda çıxışı zamanı deyib.  

Ə.Abbasov qeyd edib ki, müstəqil Azərbaycan üçün bu sahənin inkişafı 2008-ci ildən başlanmış və 2013-cü ildə öz bəhrəsini verib. Alçaq orbitli peykin 2014-cü ildə orbitə qaldırılacağını deyən Ə.Abbasov ölkəmizin kosmik sənayenin inkişafı çərçivəsində reallaşdırılacaq tədbirlərdən danışıb.

Yaponiyanın bu sahədə əldə etdiyi uğurları yüksək qiymətləndirən Ə.Abbasov qeyd edib ki, Azərbaycanın peyk bazarının əsasən Asiyaya yönəlməsinə səbəb son illər Avropadakı böhran proseslərinin baş verməsi və bu qitədə texnologiyaların inkişafının zəifləməsidir: “Bunun əksinə olaraq isə Asiyada yerləşən Yaponiya, Malayziya, İndoneziya və s. ölkələr dinamik inkişaf edir. Bu ölkələrdə texnoloji inkişaf sürətlə gedir. Xüsusən də informasiya-kommunikasiya texnologiyaları sektorunda.”

“Azərbaycan-2020: gələcəyə baxış” İnkişaf Konsepsiyasında İKT sektorunun geniş əhatə olunduğunu xatırladan nazir gələcəkdə qeyri-neft sektorunun, xüsusilə də bu sahənin inkişaf etdiriləcəyini deyib. Onun sözlərinə görə, belə bir şəraitdə başda Yaponiya olmaqla, digər ölkələr Azərbaycanın diqqətini cəlb edir: “Ölkəmiz bu qitənin bazarlarına xüsusi önəm verir.

Bu cür tədbirlər Azərbaycanın texnoloji şirkətlərinin təcrübələrini zənginləşdirməyə və rəqabət qabiliyyətinin artırılmasına xidmət edəcək”.

 

ATƏT Parlament Assambleyasının (PA) qış sessiyasının plenar iclasında Suriyadakı hadisələrin müzakirəsi zamanı Xocalı soyqırımı məsələsi də müzakirə olunub.  Bu barədə APA-ya açıqlama verən Azərbaycanın ATƏT PA-da nümayəndə heyətinin rəhbəri, Milli Məclisin vitse spikeri Bahar Muradova bildirib ki, məsələ şəxsən onun özü tərəfindən qaldırılıb: “Xocalıda kütləvi halda dinc insanların qətlə yetirilməsi, soyqırımı və buna indiyədək adekvat münasibət bildirilməməsi Suriyada baş verənlərə dünyanın laqeyd qalması ilə əlaqələndirilərək müzakirəyə çıxarıldı”.

B. Muradova qeyd edib ki, eyni zamanda Azərbaycan tərəfi Suriyadan məcburi köçürülən ermənilərin Dağlıq Qarabağ ərazisinə yerləşdirilməsi ilə bağlı plenar iclasda bəyanat səsləndirib: “ATƏT PA-nın müvafiq qurumlarından və rəsmilərindən bu məsələyə ciddi münasibət bildirmək tələb olundu. Suriyada baş verən hadisələrdən, onun humanitar nəticələrindən digər ölkələrdəki vəziyyəti daha da gərginləşdirilməsinə imkan verməməyə çağırışlar edildi”. 

AZADİNFORM. Müsavat Partiyası sədrinin müşaviri Yadigar Sadıqov  müxtəlif internet saytlarında Lənkəranda Xocalı soyqırımı qurbanlarının xatirəsini yad etmək üçün “Ana” abidəsini ziyarətə gəlmiş insanların polis tərəfindən həbs olunduğunu, onlara qarşı qadağalar tətbiq olunduğu barədə tamamilə yalan məlumatlar yaymaqla növbəti dəfə təxribat törətməyə cəhd edib. Bu bardədə məlumatı “Azadinform”a Lənkərandan veriblər.

Məlumatda deyilir: “Yadigar Sadıqovdan soruşmaq lazımdır ki, Xocalı soyqırımı qurbanlarının xatirəsini yad etmək üçün minlərlə lənkəranlı “Ana” abidəsi önünə toplaşdığı zaman o və onun “məzlum” dindar adlandırdığı bir qrup şəxs şəhərdə qapıları gecə-gündüz açıq olan məscidlərə deyil, restorana niyə gedirdilər? Əgər restoran sahibi soyqırımı qurbanlarının xatirəsinə ehtiram göstərərək həmin dindarlara  məscidə  getməyi  məsləhət bilirsə, bunda  dövlət  orqanlarının nə günahı var? Digər tərəfdən  Yadigar Sadıqov Lənkəranda Xocalı qatillərinin lənətlənməsinə yasaq qoyulduğunu iddia edirsə, onda özünün şəxsən çəkdiyi və internetdə yaydığı şəkillərdə həmin dindarların “Ana” abidəsi önündə heç bir maneəyə rast gəlmədən, sərbəst şəkildə toplaşaraq “Əllahüəkbər” dedikləri görüntülər  nəyi əks etdirir? Əlbəttə həqiqəti. Yəni, Xocalı qətliamını törədən  vəhşi ermənilər və onların havadarları Lənkəranda həmişə lənətlənir. Amma Yadigar Sadıqov bu həqiqəti ya dərk etmir, ya da görmək istəmir. Yəqin, bu da onun düşüncə tərzindəki problemlə bağlıdır”.

Qeyd edək ki, Lənkəranda Azərbaycanlıların soyqırımı qurbanlarının xatirəsinə yaradılmış parkda ümumrayon anım mərasimi keçirilib. Lənkəran ŞİH Başçısı Taleh Qaraşov, hüquq-mühafizə orqanlarının rəhbərləri, rəsmi şəxslər, kütləvi informasiya vasitələrinin nümayəndələri və minlərlə sakin mərasimdə iştirak edib tarixin ən faciəli səhifələrindən olan Xocalı soyqırımı qurbanlarının xatirəsinə ehtiramını nümayiş etdiriblər. Gün ərzində abidə şəhər sakinləri, kənd və qəsəbələrdən gələn vətəndaşlar, din xadimləri, idmançılar  və ayrı-ayrı qonaqlar tərəfindən ziyarət olunub.

 

“Rəsmi Moskvanın Dağlıq Qarabağ münaqişəsi ilə bağlı mövqeyi dəyişməyib və jurnalist Dubnovun “RİA Novosti” agentliyinin saytında dərc etdiyi “Dağlıq Qarabağ 25 ildə tanınmamağa öyrəşdi” məqaləsi bu mövqeni şübhə altına qoya bilməz”.  APA-nın məlumatına görə, bu fikirləri Rusiyanın Azərbaycandakı səfiri Vladimir Doroxin Azərbaycan xarici işlər nazirinin müavini Mahmud Məmmədquliyevlə görüşündə deyib. Bu barədə Rusiya səfirliyinin rəsmi saytında qurumun mətbuat xidmətinin şərhi yerləşdirilib.

Səfirliyin mətbuat xidmətinin məlumatına görə, Mahmud Məmmədquliyevlə söhbətin yekununda səfir Doroxin Azərbaycanın bu məsələ ilə bağlı mövqeyini rəsmi Moskvanın nəzərinə çatdıracağına söz verib.

Səfir qeyd edib ki, məqalə Dubnovun şəxsi fikrini ifadə edir və bu mövqe Rusiya Dövlət İnformasiya Agentliyinin redaksiyasının mövqeyi ilə üst-üstə düşməyə bilər.

Vladimir Doroxin bu materialın artıq “RİA Novosti”nin rəsmi saytından çıxarıldığı barədə Mahmud Məmmədquliyevə məlumat verib. Agentliyin rəhbərliyi hazırda baş verən hadisənin detallarını araşdırır.

Səfir xarici işlər naziri müavininin Rusiya-Azərbaycan münasibətlərindəki dostluq atmosferinin birgə səylərlə qorunmasının zəruriliyi fikrini bölüşdüyünü deyib.

Xatırladaq ki, Xocalı soyqrımının 21-ci ildönümü ərəfəsində “RİA Novosti” agentliyinin saytında jurnalist V. Dubnovun “Dağlıq Qarabağ 25 ildə tanınmamağa öyrəşdi” adlı məqaləsi yerləşdirilib. Bununla əlaqədar Rusiyanın Azərbaycandakı səfiri dünən Xarici İşlər Nazirliyinə çağırılıb və ona nota təqdim edilib. 

 

Lökbatanda yerləşən palçıq vulkanlarının aktivliyi Bakı-Tbilisi-Ceyhan (BTC) kəmərinə təsir göstərə bilər. Bu barədə APA-ya Azərbaycan Milli Elmlər Akademiyasının (AMEA) Geologiya İnstitutunun geodinamika və seysmologiya şöbəsinin böyük elmi işçisi Rafiq Səfərov bildirib.  Onun sözlərinə görə, artıq bir neçə ildir kəmərin seysmik təhlükəsizliyinin geniş monitorinqi aparılır: “Azərbaycan ərazisi, ümumiyyətlə, aktiv seysmik ərazidir. Kəmərin hansı qırılmalarla kəsişdiyi və seysmik aktivliyin boruya harada daha yaxın olduğu aydınlaşıb. Bu nəticələr ilbəil təqdim olunur. Boru üzrə ən aktiv zona palçıq vulkanları olan ərazidir. Lökbatanda palçıq vulkanları daha aktivdirlər və onlar boruya daha çox yaxındırlar. Onların aktivliyi boruya daha çox təsir göstərə bilər”.

F.Səfərov qeyd edib ki, eyni zamanda zəlzələlər də boruya öz təsirini göstərə bilər. Ona görə kəmər boyunca bir neçə mərhələdə araşdırma işləri aparılıb: “Azərbaycan ərazisində aktiv seymik zonalardan Şamaxı-İsmayıllı, Gəncə boruya yaxın zonalar sayılır. Bu ərazilərin boruya təsiri daim öyrənilir. Bunun üçün daimi monitorinqlər aparılmalıdır”.

Qeyd edək ki, BTC kəmərinin seymik təhlükəsizliyinin monitorinqi Geologiya İnstitutu tərəfindən bir neçə ildir ki, aparılır. Kəmərin seysmik təhlükəsizliyinin növbəti il üçün monitorinq layihəsi hazırlanaraq BP şirkətinə təqdim olunub. Sənəd hazırda danışıqlar mərhələsindədir.

AZADİNFORM. ARDNŞ-nin “Azəriqaz” İstehsalat Birliyinin əksər idarə və müəssisələrinin 2012-ci ildə elektrik təchizatının yenidən qurulması üçün “Azərenerji” ASC və “Bakıelektrikşəbəkə” ASC-yə müraciət olunub, Ağsu, Şəmkir, Şabran, Gəncə, Zaqatala, Sabirabad və digər Qaz İstismar sahələrinə texniki şərtlər alınıb. “Azadinform” xəbər verir ki, bununla yanaşı, 2011-2012-ci illərdə alınmış texniki şərtlərə əsasən, Neftçala, Naftalan, Biləsuvar, Qusar, Ağsu, Füzuli və s. Qaz İstismar sahələri üzrə yeni transformatorlar və əlavə avadanlıqlar quraşdırılmış, nəticədə həmin sahələr daimi və fasiləsiz elektrik enerjisi ilə təmin edilib.

Qazpaylayıcı Stansiyalarda ROC-407 və ROC-107 markalı sərfölçmə cihazlarının elektrik xətləri təmir edilmiş və ya yenisi ilə əvəz olunub. Elektrik təhlükəsizliyi qaydalarına əsasən sahələrdə olan dielektrik ləvazimatlar yığılaraq müvafiq qaydada laboratoriyada sınaqdan keçirilib. Ümumiyyətlə, görülən praktiki tədbirlərlə yanaşı, dizel yanacağı, benzin və elektrik enerjisinin qənaətlə və səmərəli istifadə edilməsi barədə təlimat hazırlanaraq icra üçün sahələrə göndərilib. Dizel yanacağı, benzin və elektrik enerjisindən qənaətlə istifadə edilməsi nəticəsində ötən il 140,5 ton dizel yanacağı, 116 ton benzin və 19600000 kVt elektrik enerjisinə qənaət edilmişdir. Bu istiqamətdə tədbirlər davam etdirilir.

Mövcud qaz kəmərlərində baş verən qəzaların vaxtında aradan qaldırılması məqsədilə 35 ədəd ADD markalı və 22 ədəd “Honda” markalı qaynaq aqreqatı ayrılaraq Qaz İstismar sahələrinin balansına verilib. Bundan başqa, 2012-ci ildə sahələrin balansında olan 33 ədəd ADD tipli, 8 ədəd “Honda” tipli qaynaq aqreqatları, eləcə də 6 ədəd generator və 2 ədəd su nasosu təmir olunmuşdur. Sahələrdə qaynaq ütülərinin işləməsi məqsədilə 13 kVt gücündə 36 ədəd generator ayrılıb.

 

AZADİNFORM. Martın 4-dən 12-ə qədər 17 yaşadək futbolçulardan ibarət Azərbaycan yığma komandasının Yunanıstanda təlim-məşq toplanışı olacaq. “Azadinform” xəbər verir ki, yığmamız martın 13-dən 17-dək Yunanıstanın Xalkida şəhərində UEFA tərəfindən təşkil olunmuş “Development Tournament” turnirində iştirak edəcək. Komandanın heyətinə Qasımov Ağaseyid - "Qarabağ", Turabov Eltun - "Qarabağ", Şirinov Yusif - "Qəbələ", Əlibabayev Vüqar - "Qəbələ", Mustafazadə Bəhlul - "Qəbələ", Əsədli Fərid - "Qəbələ", Babayev Heydər - "Qəbələ", Hüseynov Roman - "Qəbələ", Zamanov Emin - "Qəbələ", Nəbiyev Yusif - "Qəbələ", Məmmədov Elməddin - "Neftçi", Ağaverdiyev Renat - "Bakı", Akmurzaev Umar - "Bakı", Mədətov Mahir - "Bakı", Taşqın Sərtan - "İnter", Cəfərov Elnur - "Xəzər Lənkəran", Uluxanov Elgün - MOİK (Rusiya), Cəbrayılov Şahban - "Anji" (Rusiya), Tağıyev Rafiq - "Tavriya" (Ukrayna), Altin Ozan - "Tus Koblenz 1911" (Almaniya) dəvət olunub.

 

AZADİNFORM. Kənd Təsərrüfatı Nazirliyi yanında Dövlət Baytarlıq Xidmətinin Bərdə rayon Baytarlıq idarəsinin rəisi Alim Zeynalov, idarənin rəis müavini Səyyab Cəfərovla qabaqcadan əlbir olub cinayət əlaqəsinə girərək xidməti səlahiyyətlərinin icrası ilə əlaqədar edəcəkləri qanunsuz hərəkətə, yəni vətəndaşın barəsində tərtib olunmuş aktın ləğv edilərək tədbir görülməməsi üçün 2.000 (iki min) manat məbləğində rüşvət tələb edib. “Azadinform” Baş Prokurorluğa istinadən xəbər verir ki, Baş prokuror yanında Korrupsiyaya qarşı mübarizə idarəsinin əməkdaşları tərəfindən həyata keçirilmiş əməliyyat tədbirləri nəticəsində fevralın 20-də rayon Baytarlıq idarəsinin inzibati binasında A.Zeynalov xidməti otağında Ağcabədi rayon sakinindən 500 manat məbləğində pulu rüşvət kimi alarkən cinayət başında yaxalanıb. A.Zeynalov və S.Cəfərov Cinayət Məcəlləsinin 311.3.1-ci (rüşvət alma) maddəsi ilə təqsirləndirilən şəxs qismində cəlb edilərək onlara həmin maddələrlə ittiham elan olunmaqla barələrində məhkəmənin qərarı ilə həbs qətimkan tədbiri seçilib.

Bundan başqa, Şabran rayon sakininin Əmək və Əhalinin Sosial Müdafiəsi Nazirliyinin 14 saylı Tibbi Sosial Ekspert Komissiyasının sədri İmran Məmmədovun əlillik dərəcəsinin təyin edilməsi üçün rayon sakinlərindən rüşvət alması barədə müraciəti Baş prokuror yanında Korrupsiyaya qarşı mübarizə idarəsində araşdırılıb. İdarənin əməkdaşlarından ibarət istintaq-əməliyyat qrupu tərəfindən komissiyanın inzibati binasında məhkəmənin müvafiq qərarına əsasən əməliyyat-axtarış fəaliyyətinin gedişində əldə edilmiş materiallarla vətəndaşın müraciətində göstərdiyi xüsusatlar öz təsdiqini tapıb. Müəyyən edilib ki, fevralın 20-də TSEK-in sədri İ.Məmmədov xidməti vəzifəsinin icrası ilə əlaqədar xidməti otağında Şabran şəhər sakini Mircabbar Hüseynovdan bacısı Yeganə Abdullayevaya ömürlük əlillik dərəcəsinin təyini üçün 1.500 manat məbləğində pul tələb etmiş, M.Hüseynov da öz növbəsində həmin məbləği ona rüşvət kimi verib. 

Cinayətkar fəaliyyətini davam etdirən İ.Məmmədov eyni məqsədlə ona müraciət etmiş M.Hüseynovun digər bacısı Qərənfil Abdullayevadan da 1.000 manat məbləğində pulu təkrarən rüşvət kimi alıb. Baxış zamanı İ.Məmmədovun xidməti otağından 3.600 manat pul, müxtəlif şəxslərin adına olan müayinə işləri və digər sənədlər, yaşadığı evdən isə 31 ədəd bankomat kartları və 15.340 manat məbləğində pul aşkar edilərək maddi sübut kimi götürülüb. 

Törətdiyi cinayət əməlinə görə İ.Məmmədov Cinayət Məcəlləsinin 311.3.2-ci (təkrar rüşvət alma) maddəsi ilə təqsirləndirilən şəxs qismində cəlb edilərək ona həmin maddə ilə ittiham elan olunmaqla barəsində məhkəmənin qərarı ilə həbs qətimkan tədbiri seçilib. M.Hüseynov isə həmin məcəllənin 312.1-ci (rüşvət vermə) maddəsi ilə təqsirləndirilən şəxs qismində cəlb edilərək barəsində polisin nəzarəti altına vermə qətimkan tədbiri seçilib. Hazırda hər iki cinayət işi üzrə istintaq tədbirləri davam etdirilir.

Amerikanın Nümayəndələr Palatasının Ohayo statından olan konqresmeni Tim Rayan Xocalı soyqımı barədə bəyanat verib. Bu barədə Trend ABŞ-ın Azərbaycandakı səfirliyinə istinadən məlumat verib.

"Mən 26 fevral 1992-ci ildə Azərbaycanın kiçik Xocalı şəhərində baş verən Xocalı soyqrımının beynəlxalq aləmdə tanınması üçün səy göstərən həmkarlarıma, insanlara qoşuluram. Təcavüz nəticəsində 613 azərbaycanlı qətlə yetirilib. Bu, Cənubi Qafqazın yeni tarixində törədilmiş ən dəhşətli hadisələrdən biridir",- deyə Rayan qeyd edib.

O bildirib ki, hadisədən 21 il keçməsinə baxmayaraq, hələ də 150 Xocalı sakinin taleyi barədə məlumat yoxdur.

"Ermənistan-Azərbaycan müharibəsi zamanı çoxsaylı itkilər və işgəncələr Dağlıq Qarabağ münaqişəsinin hərbi yolu ilə deyil, siyasi yolla həllinin şərtləndirir. Münaqişənin ədalətli və hamı tərəfindən qəbul olunan şərtlər çərçivəsində həlli regionda stabilliyin, inkişafın və sülhün qorunmasının yeganə təminatıdır",- konqresmen bildirib.

Onun sözlərinə görə, ATƏT-in Minsk qrupunun həmsədr ölkələrindən biri kimi ABŞ hər iki tərəflə əməkdaşlıq edir.

"Biz Xocalı qətliamı zamanı həlak olmuş 613 nəfəri xatırlayır və kədərlənirik. İnsan hüquqlarının qorunmasının hamıya şamil edilməsi üçün birgə çalışırıq", - Rayan bildirib.

AZADİNFORM. Mingəçevirdən 35 km şimal-qərbdə zəlzələ qeydə alınıb. “Azadinform” AMEA-nın Respublika Seysmoloji Xidmət Mərkəzinə istinadən xəbər verir ki, təkanlar hiss olunmayıb.


 

Türkiyə Böyük Millət Məclisinin (TBMM) sədri Cəmil Çiçək Xocalı soyqırımının 21-ci ildönümü ilə bağlı Ankarada təşkil olunmuş tədbirlərdə iştirak etmək üçün Türkiyəyə səfər edən Azərbaycan nümayəndə heyətini qəbul edib.

Azərbaycan Respublikasının Türkiyədəki səfirliyindən Trend-ə verilən məlumata görə, TBMM sədri Cəmil Çiçək qonaqları salamlayıb, Xocalı soyqırımının 21-ci ildönümü günündə öz hisslərini bölüşüb. O, Ermənistanın işğalçı siyasətindən, XXI əsrdə modern dünyanın gözləri önündə soyqırımı törətməkdən çəkinməməsindən, bu ağrını və acını Türkiyənin 21 ildir dərindən hiss etdiyindən, dünyanın aparıcı dövlətlərinin Azərbaycanın məruz qaldığı haqsızlıqlara qarşı ikili standartla yanaşdığından və problemlərimizin həlli üçün türk dünyasının birgə hərəkət etməsinin vacibliyindən söz açıb.

Cəmil Çiçək qeyd edib ki, Türkiyə tərəfi beynəlxalq toplantılar və platformlarda hər zaman iki əsas mövzunu gündəmə gətirməkdədir: Azərbaycanın ərazi bütövlüyü və Kipr problemi.

Azərbaycan Respublikasının Prezidenti Administrasiyasının İctimai-siyasi məsələlər şöbəsinin müdiri Əli Həsənov öz növbəsində TBMM sədrinə öz dərin minnətdarlığını bildirib, göstərilən dəstəyə görə təşəkkür edib. Əli Həsənov qeyd edib ki, gün gələcək, Türkiyə başda olmaqla, Xocalı soyqırımını bütün dünya dövlətləri tanıyacaq, qaçqın və məcburi köçkünlər öz yurd-yuvalarına qayıdacaqlar.

Qeyd edək ki, qəbulda Azərbaycan Respublikasının Prezidenti Administrasiyasının İctimai-siyasi məsələlər şöbəsinin müdiri Əli Həsənov, Milli Məclisin üzvləri Qənirə Paşayeva, Musa Qasımlı, Yaqub Mahmudov, AMEA-dan isə Rəna Mirzəzadə və Cəbi Bəhramov iştirak ediblər. 

 

AZADİNFORM. Şirvan şəhərində vətəndaşa məxsus ümumi sahəsi 160 kv.m olan birmərtəbəli 3 otaq və aynabənddən ibarət evin 32 kv.m sahədə aynabəndin tavan hissəsi və evin çardağının yanar konstruksiyaları 50 kv.m sahədə yanıb. Evin qalan hissəsi yanğından mühafizə olunub. “Azadinform” xəbər verir ki, Şəmkir rayonunda vətəndaşa məxsus ümumi sahəsi 208 kv.m olan birmərtəbəli 2 otaq və aynabənddən ibarət evin 1 otağının tavanı 6 kv.m sahədə yanıb. Evin qalan hissəsi yanğından mühafizə olunub. 

Xəzər rayonunda ümumi sahəsi 220 kv.m olan tövlənin dam örtüyü 150 kv.m sahədə yanıb. Tövlənin qalan hissəsi və yaxınlıqdakı digər tövlələr yanğından mühafizə olunub. 

Bu gün Parisdə Fransa Milli Assambleyasının binasında iki azərbaycanlı tələbə vəhşicəsinə döyülüb. APA-nın Avropa müxbirinin məlumatına görə, Fransa Milli Assambleyası Fransadakı erməni icmasının nümayəndələri və Fransa parlamentinin bir neçə deputatının iştirakı ilə  “Sumqayıt hadisələrindən 25 il sonra; hazırkı vəziyyət və Dağlıq Qarabağ xalqı üçün gələcək perspektivlər” adlı tədbir keçirilib.

Tədbirin təşkilatçısı Fransa Milli Assambleyasının üzvü, ermənipərəst mövqeyi ilə tanınan parlamentar Fransua Roşebloun olub.

Tədbir barədə məlumat əldə edən Fransada təhsil alan iki azərbaycanlı tələbə- Mirvari Fətəliyeva və Vüsal Hüseynov konfrans zalına gəliblər. Onlar tədbirin gedişində Xocalı hadisənin bu gün baş verdiyini bildirib, şüarlar səsləndiriblər. Lakin onların şüarları təhdidlə qarşılanıb.

Konfrans zalının qapılarını bağlayan tədbir təşkilatçıları hər iki tələbəni vəhşicəsinə döyüblər, onların döyülməsi çağırışını isə deputat Fransua Roşebloun şəxsən edib.

Hadisə yerinə polis və təcili tibbi yardım gəlib.

Azərbaycanın Fransadakı səfirliyinin əməkdaşları da hazırda hadisə yerindədirlər. Onlar APA-ya faktı təsdiqləyərək, azərbaycanlı tələbələrə ağır xəsarət yetirildiyini bildiriblər: “Hazırda tələbələrimizə ilkin tibbi yardım göstərilir. Onların vəziyyəti ağırdır, xəstəxanaya aparılacaqlar”.

APA-nın Avropa müxbirinin məlumatına görə, hadisə tədbir başlayanda baş verib. Belə ki, tədbir iştirakçıları Sumqayıtda ölən erməniləri bir dəqiqəlik sükutla yad ediblər. Bu vaxt ayağa qalxmayan Azərbaycan tələbələrdən bunun səbəbi soruşulub. Mirvari Fətəliyeva isə “bu gün Azərbaycanda Xocalı soyqırımının ildönümüdü, biz bu qətliamı yad edirik” deyə cavab verib.

Onun bu sözü erməniləri özündən çıxarıb və 40 nəfərə qədər erməni və fransız tələbələri döyüb.

Tələbə xanıma daha az xəsarət yetirilməsinə çalışan digər azərbaycanlı tələbə Vüsal Hüseynov çox ağır bədən xəsdarətləri alıb. Onun daxili orqanlarının zədələndiyi, qabırğasının sındığı bildirilir.

AZADİNFORM. Xaçmaz rayonu, Muxtadır qəsəbəsində vətəndaşa məxsus ümumi sahəsi 180 kv.m olan birmərtəbəli 4 otaq və 1 qarajdan ibarət evin 2 otağının və qarajın yanar konstruksiyaları 148 kv.m sahədə yanıb. Yanğın zamanı qarajda olan "VAZ" markalı minik avtomobili və "Dnepr" markalı motosikletin yanar konstruksiyaları yanıb. Evin qalan hissəsi yanğından mühafizə olunub.

AZADİNFORM. Bu gün Bakıda, “Hilton” mehmanxanasında Azərbaycan-Yaponiya Peyk sektoruna həsr olunmuş seminar keçirilir. “Azadinform” xəbər verir ki, Yaponiya tərəfindən seminarda 17 şirkəti təmsil edən 30, Azərbaycan tərəfindən isə rabitə və informasiya texnologiyaları naziri Əli Abbasovun rəhbərliyi ilə 24 şirkəti təmsil edən 40 nəfər iştirak edir.

Azərbaycan-Yaponiya Peyk sektoruna həsr olunacaq seminarın əsas məqsədi Yaponiya və Azərbaycan tərəfdaşları arasında Azərbaycanda və Yaponiyada olan peyk proqramları, Yaponiyanın peyklə bağlı xidmət və məhsulları (peyklər, roketlər, yerüstü müşahidə və telekommunikasiya texnologiyaları), Azərbaycanda peykdən istifadə, peyk imiclərindən istifadə üçün tələb və ehtiyaclar haqqında məlumatların ötürülməsi və mübadilə olunmasını təmin etməkdir.

Qeyd edək ki, seminar Yaponiya ilə Azərbaycan arasında iqtisadi əlaqələrin müxtəlifliyi baxımından əməkdaşlığın inkişaf etdirilməsi və eyni zamanda iki ölkə arasında dostluq və tərəfdaşlıq münasibətlərinin daha da gücləndirilməsinə dəstək verir.

AZADİNFORM. Erməni silahlı bölmələri dünən və bu gecə Ermənistan Respublikasının Krasnoselsk rayonunun ərazisindəki adsız yüksəkliklərdə yerləşən mövqelərdən Gədəbəy rayonunun ərazisindəki adsız yüksəkliklərdə yerləşən mövqelərimizi atəşə tutub. “Azadinform” xəbər verir ki, ermənilər həmçinin Goranboy rayonunun işğal olunmuş Tapqaraqoyunlu, Ağdam rayonunun Mərzili, Tərtər rayonunun Qızıl Oba və Göyarx kəndləri yaxınlığında yerləşən mövqelərdən də Azərbaycan Silahlı Qüvvələrinin mövqeləri atəşə tutublar.  

Düşmən cavab atəşi ilə susdurulub.

 

AZADİNFORM. “Pakistanda hər hansı bir radikal dini qruplaşmanın himayəsi altında təhsil alan Azərbaycan vətəndaşı yoxdur”. 

 

Gürcüstan prezidenti Mixail Saakaşvili Xüsusi Dövlət Mühafizə Xidmətindən tam imtina edib. APA-nın “Qruziya Onlayn”a istinadən verdiyi xəbərə görə, bu barədə bu Tiflisdə keçirilən brifinqdə prezidentin mətbuat katibi Manana Mancqaladze bildirib.  

 
7396 səhifə 9341-dən (dan) << < 7392 7393 7394 7395 7396 7397 7398 7399 7400 > >>
 Xəbər lenti
11.12.2018
 Arxiv
Dek.2018
Be.Ça.Çə.Ca.Cü.Şə.Ba.
     12
3456789
10111213141516
17181920212223
24252627282930
31      
 
2018 All right reserved www.azadinform.az Powered by Danneo