İtaliyalı müəllimlər AzMİU tələbələri üçün vorkşop təşkil ediblər

AZADİNFORM. İtaliyanın Milan Politexnik Universiteti ilə Azərbaycan Memarlıq və İnşaat Universiteti (AzMİU) arasında 2018-ci ildə imzalanmış Anlaşma Memorandumunda nəzərdə tutulan əməkdaşlıq çərçivəsində AzMİU-nun nəzdində yaradılmış İtaliya – Azərbaycan Dizayn Mərkəzinin açılış mərasimi, işgüzar görüşlərin və vorkşopun keçirilməsi ilə əlaqədar Milan Politexnik Universitetinin nümayəndə heyəti universitetin qonağı olub.

Bu barədə Azadinform-a AzMİU-dan məlumat verilib.

Məlumatda bildirilir ki, əməkdaşlığın nəticəsi olaraq 13-17 may tarixlərində AzMİU-da vorkşop təşkil olunub. Vorkşop Milan Politexnik Universitetinin müəllimləri - professor Mauro Ceconello və dosent Silvia Qramegna tərəfindən aparılıb. Memarlıq fakültəsində keçirilən və “İtaliya-Azərbaycan Dizayn Mərkəzinin identikliyi” mövzusuna həsr olunan vorkşop sərgi qurğuları və naviqasiya işarələri sisteminin inkişaf etdirilməsi üçün nəzərdə tutulub.

Vorkşopun ilk günü Milan Politexnik Universitetinin dosenti Silvia Qramegna “İtaliya-Azərbaycan Dizayn Mərkəzinin identikliyi” mövzusunda tələbələrə mühazirə deyib. Prezentasiya ilə təqdim olunan mühazirədən sonra tələbələrə tapşırıqlar verilib, onlar verilən tapşırıqlara uyğun olaraq işə başlayıblar. 

İnteryer dizayn və qrafik dizayn ixtisasında təhsil alan 25 tələbənin qatıldığı vorkşopda tələbələr italiyalı müəllimlərlə ünsiyyətdə olur, layihənin işlənməsi ilə bağlı faydalı məsləhətlər alırlar. Dizayn kafedrasının müəllim heyətinin iştirakı ilə keçən vorkşopda gənc dizaynerlər 4-5 nəfərlik qruplara bölünüb, texniki eskizlər, moodboard, colorboard, materialboard şəklində, müstəqil elementlərdən olan bir sərgi sistemi üçün konsepsiyanı, həmçinin Dizayn Mərkəzinin vizual kommunikasiya sistemini (loqotip, rəng sxemi, naviqasiya işarələri sisteminin məkan proqramında tətbiqi) əhatə edən təklifi müəyyənləşdirməlidirlər. Tələbələr vorkşopda qrup şəklində işlədikləri ideyaları layihə formasında təqdim edirlər. Qeyd edək ki, vorkşopun məqsədi Dizayn Mərkəzinin interyerlərinə və vizual kommunikasiyaya dair araşdırma və yeni həllər təklif etməkdir.

16.05.2019 14:22 / Baxılıb: 161 / Çap
 
Bu bölmədə
 Xəbər lenti
23.05.2019
 
2019 All right reserved www.azadinform.az Powered by Danneo