Yeni yem emalı müəssisələri fəaliyyətə başlayıb

Adəm Abbaslı/AZADİNFORM. Azərbaycan Hökuməti və ABŞ-ın Beynəlxalq İnkişaf Agentliyi tərəfindən birgə həyata keçirilən "Sosial-iqtisadi inkişaf fəaliyyəti" (SEDA) layihəsi çərçivəsində daha bir yem emalı müəssisəsi Tərtər rayonunun Azad Qaraqoyunlu kəndində fəaliyyətə başlayıb.

Azadinform-un məlumatına görə, yem emalı müəssisəsinin istifadəyə verilməsi ilə bağlı İqtisadiyyat Nazirliyinin tabeliyində Kiçik və Orta Biznesin İnkişafı Agentliyinin (KOBİA) təşkilatçılığı ilə tədbir keçirilib. 

Tədbirdə çıxış edən KOBİA-nın İdarə Heyəti sədrinin müavini Elçin İbrahimov, Tərtər Rayon İcra Hakimiyyətinin başçısı Müstəqim Məmmədov və ABŞ-ın Beynəlxalq İnkişaf Agentliyinin layihə meneceri Pərviz Musayev regionlarda icma əsaslı biznesyönümlü layihələrin icrasının, o cümlədən Tərtər rayonunun Azad Qaraqoyunlu kəndində yem emalı müəssisəsinin istifadəyə verilməsinin bölgədə aqrar sektorun inkişafı, heyvandarlıq və bitkiçilik sahəsində fəaliyyətin genişləndirilməsi, yemə olan tələbatın ödənilməsi və məşğulluğun artırılmasında əhəmiyyətli olduğunu qeyd ediblər. 

Qeyd edək ki, Azərbaycan Hökuməti və ABŞ-ın Beynəlxalq İnkişaf Agentliyi tərəfindən birgə həyata keçirilən layihə çərçivəsində həmin gün Bərdə rayonunun Yeni Daşkənd kəndində də yem emalı müəssisəsi istifadəyə verilib. Bu, sayca 22-ci yem emalı müəssisəsidir. 

Xatırladaq ki, müəssisələrdə yem emalı üçün istehsal sahəsi və anbar inşa olunub, hər birinin gücü saatda 2 ton olan toxum təmizləyən, yem üyüdən və ot doğrayan avadanlıqlar quraşdırılıb, yeni iş yerləri açılıb.

18.03.2019 12:27 / Baxılıb: 182 / Çap
 
Bu bölmədə
 Xəbər lenti
22.04.2019
21.04.2019
 
2019 All right reserved www.azadinform.az Powered by Danneo