Azərbaycan-Serbiya Hökumətlərarası Komissiyasının 5-ci iclası keçirilib

AZADİNFORM. İqtisadiyyat naziri, Azərbaycanla Serbiya arasında ticarət və iqtisadi əməkdaşlıq üzrə Hökumətlərarası Komissiyanın həmsədri Şahin Mustafayevin rəhbərlik etdiyi Azərbaycan nümayəndə heyəti Serbiyada səfərdə olub.

İqtisadiyyat Nazirliyindən Azadinform-a verilən məlumata görə, Azərbaycan nümayəndə heyəti Taş Maydan Parkında Ümummilli Lider Heydər Əliyevin abidəsinin önünə əklil qoyub, xatirəsini ehtiramla yad edib. Azərbaycan nümayəndə heyəti həmçinin yazıçı Milorad Pavicin və 1999-cu ildə Belqradın bombalanması zamanı öldürülən uşaqların xatirəsinə ucaldılmış abidələrini də ziyarət edib.

Sonra Serbiya Palatasında Hökumətlərarası Komissiyanın həmsədrlərinin - Azərbaycanın iqtisadiyyat naziri Ş.Mustafayevin, Serbiyanın Baş nazirinin müavini, ticarət, turizm və telekommunikasiya naziri Rasim Lyayiçin rəhbərlik etdiyi nümayəndə heyətləri üzvlərinin və Serbiya şirkətlərinin iştirakı ilə Dəyirmi Masa keçirilib. Tədbirdə Azərbaycanda yaradılmış əlverişli biznes və investiya mühiti barədə məlumat verilib, Azərbaycan və Serbiya işgüzar dairələri arasında əlaqələrin inkişafına, biznes sahəsində ikitərəfli əməkdaşlığın genişləndirilməsinə dair müzakirələr aparılıb.

Həmin gün Azərbaycan və Serbiya arasında ticarət və iqtisadi əməkdaşlıq üzrə Hökumətlərarası Komissiyanın 5-ci iclası keçirilib. Azərbaycan tərəfindən Ş.Mustafayevin rəhbərlik etdiyi Hökumətlərarası Komissiyaya müvafiq dövlət qurumlarının yüksək vəzifəli rəsmiləri daxil idi. Serbiya tərəfi isə iclasda R.Lyayiçin rəhbərlik etdiyi nümayəndə heyəti ilə təmsil olunub.

İclasda çıxış edən Ş.Mustafayev Azərbaycan və Serbiya əlaqələrinin strateji əməkdaşlığa, qarşılıqlı dostluq və hörmət prinsiplərinə əsaslandığını, dövlət başçılarının əməkdaşlığa böyük önəm verdiyini qeyd edib. Ş.Mustafayev Azərbaycan Prezidenti İlham Əliyevin 2011-ci ildə Serbiyaya, Serbiya Prezidenti Aleksandr Vuçiçin 2018-ci ilin mayında Azərbaycana səfərlərinin ikitərəfli əməkdaşlığın inkişafında mühüm əhəmiyyətini vurğulayıb.

Diqqətə çatdırılıb ki, ölkələrimiz arasında möhkəm hüquq-müqavilə bazası mövcuddur. Serbiya ilə ticarət-iqtisadi, investisiyaların təşviqi, vergitutma və s. sahələrdə 30-dan çox sənəd imzalanıb. 2013-cü ildə imzalanmış “Azərbaycan Respublikası ilə Serbiya Respublikası arasında dostluq və strateji tərəfdaşlıq haqqında Bəyannamə” və 2018-ci ilin mayında imzalanmış “Azərbaycan Respublikası ilə Serbiya Respublikası arasında Strateji Əməkdaşlıq üzrə Birgə Fəaliyyət Planı” ölkələrimiz arasında ikitərəfli əməkdaşlığın xarakterini müəyyən edən əsas sənədlərdir.

Serbiya Prezidentinin Azərbaycana sonuncu səfəri zamanı ölkələrimiz arasında tibb və tibbi təhsil, məhkəmə, karantin və bitki mühafizəsi, beynəlxalq yükdaşımalar və hava əlaqələri sahəsində bir sıra mühüm sənədlər imzalanıb, Azərbaycan-Serbiya işgüzar görüşü keçirilib.

Qeyd edilib ki, ölkələrimiz arasında əməkdaşlığın əsas istiqamətlərindən biri də ticarət əlaqələridir. 2017-ci ildə ölkələrimiz arasında ticarət dövriyyəsi 36%, 2018-ci ilin ilk 9 ayında isə 33% artıb. Azərbaycan və Serbiya arasında qarşılıqlı investisiya qoyuluşu həyata keçirilir. Azərbaycanın “Azvirt” şirkəti Serbiyada həyata keçirilən infrastruktur layihələrində iştirak edir. Turizm sahəsində də əməkdaşlığımız inkişaf edir. 2017-ci ildə Azərbaycana gələn Serbiya vətəndaşlarının sayında 14% artım müşahidə edilib. Azərbaycan vətəndaşları Serbiyaya vizasız səfər edə bilər, Serbiya vətəndaşları isə ölkəmizə səfər zamanı “ASAN viza” sisteminin imkanlarından istifadə edə bilərlər. Humanitar sahədə əməkdaşlığa gəlincə, Ş. Mustafayev qeyd edib ki, 2018-ci ildən Belqrad Universitetində Azərbaycan Dili və Mədəniyyəti Mərkəzi, Azərbaycan Dillər Universitetində Serb Dili və Mədəniyyəti Mərkəzi fəaliyyət göstərir.

Ş. Mustafayev vurğulayıb ki, dövlət başçılarının möhkəm siyasi iradəsi, ölkələrimizin geniş iqtisadi potensialı və qarşılıqlı maraq səmərəli əməkdaşlıq üçün əlverişli imkan yaradır.

R. Lyayiç çıxışında ölkəsinin Azərbaycanla əlaqələrə böyük əhəmiyyət verdiyini vurğulayıb, ticarət-iqtisadi əlaqələrin genişləndirilməsi, energetika, kənd təsərrüfatı, infrastruktur, İKT, turizm və s. sahələrdə əməkdaşlıq imkanlarını qeyd edib. İclasda komissiya üzvləri müzakirə olunan məsələlərə və iqtisadiyyatın ayrı-ayrı sahələri üzrə əməkdaşlığın inkişafına dair fikir mübadiləsi aparıblar.

Sonda Azərbaycan və Serbiya arasında ticarət və iqtisadi əməkdaşlıq üzrə Hökumətlərarası Komissiyanın 5-ci iclasının yekunlarına dair Protokol imzalanıb. Sənədi Komissiyanın həmsədrləri Ş.Mustafayev və R.Lyayiç imzalayıblar. Sənəddə iqtisadi-ticarət, investisiya, maliyyə, sənaye, enerji, nəqliyyat, infrastuktur, kənd təsərrüfatı, kiçik və orta sahibkarlıq, İKT, təhsil, səhiyyə, ekologiya, turizm, mədəniyyət, gənclər, idman və digər sahələrdə əməkdaşlığın davam etdirilməsi və genişləndirilməsi nəzərdə tutulur.

Serbiyaya səfər çərçivəsində Azərbaycan nümayəndə heyəti Serbiyanın səhiyyə naziri Zlatibor Lonçarla görüşüb. Görüşdə Azərbaycanda yaradılmış Pirallahı Sənye Parkının imkanları barədə məlumat verilib, Serbiya şirkətləri ilə əczaçılıq sahəsində əməkdaşlıq məsələləri müzakirə edilib.

8.12.2018 18:21 / Baxılıb: 60 / Çap
 
    Bu bölmədə
     Xəbər lenti
    12.12.2018
     
    2018 All right reserved www.azadinform.az Powered by Danneo