DOST işəgötürən və işçilərə metodiki köməklik göstərəcək

Adəm Abbaslı/AZADİNFORM. Əmək və Əhalinin Sosial Müdafiəsi Nazirliyinin tabeliyində yaradılacaq “DOST” (Dayanıqlı və Operativ Sosial Təminat) mərkəzlərində işəgötürənlərə və işçilərə əmək qanunvericiliyinin tətbiqi barədə metodiki köməklik də göstəriləcək.

Nazirlikdən Azadinform-a verilən məlumata görə, bununla yanaşı, əmək qanunvericiliyinə əməl olunmasına dövlət nəzarətini həyata keçirən qurum olan nazirlik yanında Dövlət Əmək Müfəttişliyi Xidməti tərəfindən əmək müqaviləsi bildirişlərinin qeydiyyata alınması və bu barədə işəgötürənə, əmək müqaviləsi bildirişləri barədə işçilərə məlumatın verilməsi “DOST” mərkəzlərinin xidmətləri sırasına daxildir. Mərkəzlərdə yeni və yenidən qurulmuş müəssisələrin, obyektlərin, istehsalat vasitələrinin əməyin mühafizəsi tələblərinə uyğunluğunu təyin edən sertifikat-pasportların təqdim olunması da həyata keçiriləcək.

Müəssisə və təşkilatlarda əməyin mühafizəsi xidmətlərinin yenidən təşkili və ya ləğv edilməsinə razılıq verilməsi, əməyin mühafizəsi normaları və qaydaları üzrə təlimlərin təşkil edilməsi “DOST” mərkəzlərində göstəriləcək xidmətlərdən olacaq.

Xatırladaq ki, “DOST” mərkəzlərində Əmək və Əhalinin Sosial Müdafiəsi Nazirliyinin fəaliyyət sahələri üzrə 124 xidmət təqdim olunacaq.

22.10.2018 14:41 / Baxılıb: 318 / Çap
 
    Bu bölmədə
     Xəbər lenti
    17.11.2018
     
    2018 All right reserved www.azadinform.az Powered by Danneo