AzMİU 12-ci Beynəlxalq Təhsil Sərgisində iştirak edib

AZADİNFORM. “Uşaqların gələcəyinə sərmayə” devizi altında Bakı Ekspo Mərkəzində 12-ci Azərbaycan Beynəlxalq Təhsil Sərgisi (“Education 2018”) keçirilib.

Ölkəmizin aparıcı universitetləri, eləcə də orta təhsil, ilk peşə-ixtisas təhsil  müəssisələri, ixtisaslaşma mərkəzlərinin iştirak etdiyi sərgiyə eyni zamanda dünyanın 12 ölkəsindən 135 iştirakçı da qatılıb.

Sərgidə Azərbaycan Memarlıq və İnşaat Universiteti (AzMİU) geniş pavilyonda təmsil olunub.İştirakçılar AzMİU-nun sərgisi ilə xüsusi maraqlanıb, universitetin fakültə və ixtisasları ilə yaxından tanış olub, müxtəlif suallar ünvanlayıblar.

12-ci Azərbaycan Beynəlxalq Təhsil Sərgisi (“Education 2018”) ilə tanış olan təhsil naziri Ceyhun Bayramov AzMİU-nun pavilyonuna da baş çəkib, universitetin fəaliyyəti, gələcək planları ilə maraqlanıb. AzMİU-nun rektoru professor Gülçöhrə Məmmədova, Strateji inkişaf üzrə prorektor Ülkər Səttarova universitetin fakültə və ixtisasları, beynəlxalq əlaqələri, gələcək perspektivləri haqqında nazirə məlumatlar veriblər.