Son 3 ay ərzində tullantıların düzgün idarə olunmaması ilə bağlı 77 müraciət daxil olub

Şəfa Tapdıq/AZADİNFORM. "Son 3 ay ərzində ETSN-in Qaynar xəttinə tullantıların düzgün idarə olunmaması ilə bağlı 77 müraciət  daxil olub. 16 tikinti obyekti üzrə araşdırmalar aparılıb və tədbirlər görülüb".

Azadinform xəbər verir ki, bu sözləri Ekologiya və Təbii Sərvətlər Nazirliyinin Ekoloji maarifləndirmə və ictimaiyyətlə əlaqələr şöbəsinin müdiri Umayra Tağıyeva bildirib. U. Tağıyeva qeyd edib ki, tullantıların düzgün idarə olunmamasına görə “Azadlıq Residence” MMC, “Cavid-2016” MMC, “Elite City” MMC barəsində protokollar tərtib edilərək inzibati məsuliyyətə cəlb olunublar: "Eyni zamanda “Bina” MTK, “Bizim Ev” MMC, “Pilot-İnşaat A” MMC, “Retro Holding” MMC, “Azəri Tikinti Şirkəti” MMC, “İlk İnşaat Taahhüt Sanayi və Ticarət Anonim” Şirkəti, “Grand Plaza” MMC, “Malibo” MMC, “Araz-2011A” MMC, “N-Turan” MMC, “Kəmər İnşaat” MMC, və fiziki şəxslərə icrası məcburi olan göstərişlər verilib. 

Heç kimin belə fikri yoxdur ki, tikintilər dayandırılsın, karxanalar olmasın. Bu mümkün deyil. Şəhərimizdə böyük tikinti işləri aparılır, şəhərimiz gözəlləşir, bunlar göz gabağındadır. Lakin bu gözəl işlər, gərək əhalimizin səhhətinə mənfi təsir göstərməsin. Məqsədimiz ondan ibarətdir ki, istənilən fəaliyyət qəbul olunmuş ekoloji normativlərə uyğun aparılsın. Olmaz ki,  həm abadlaşma, tikinti işləri aparılsın, həm də insanların rahatlığına, sağlamlığına zərər gəlməsin. Əlbəttə ki olar. Buna görə müxtəlif qoruyucu texnologiyalar mövcuddur".

Nazirlik nümayəndəsi bildirib ki, bu sahədə çalışan şəxslər öz fəaliyyətlərini qəbul olunmuş ekoloji  normalara uyğun qurmalıdırlar: "Nazirliyimiz tərəfindən bu məsələyə ciddi nəzarət var. Buna görə də qısa müddətdə bu sahədə artıq dönüş yaranmalıdır. Və dediyimiz kimi qabaqcıl ölkələrdə istifadə olunan texnologiyalar bizdə də tətbiq olunmalıdır. 

Hər bir ölkə vətəndaşının təmiz ətraf mühitdə yaşamaq hüququ var".

21.09.2018 15:50 / Baxılıb: 112 / Çap
 
    Bu bölmədə
     Xəbər lenti
    10.12.2018
    9.12.2018
     
    2018 All right reserved www.azadinform.az Powered by Danneo