Məhəmməd Hadi küçəsinin 2.8 km-lik hissəsi təmir edildi - FOTO - VİDEO

Adəm Abbaslı/AZADİNFORM. Xətai rayonu, Məhəmməd Hadi küçəsində yenidənqurma və bərpa işləri davam edir.

Azərbaycan Avtomobil Yolları Dövlət Agentliyindən Azadinform-a verilən məlumata görə, artıq küçənin 2.8 km-lik hissəsində işlər tam olaraq yekunlaşdırılıb. Hazırda küçənin kəsişdiyi “Ukrayna dairəsi”ndə təmir-tikinti işləri aparılır.

Məhəmməd Hadi küçəsinin 6 hərəkət zolaqlı olmaqla köməkçi yolla bərabər uzunluğu 4.4 km təşkil edir. Başlanğıcını Qara Qarayev və Babək prospektləri ilə kəsişməsindən götürən küçə Xətai rayonunun intensiv nəqliyyat axını olan küçələri ilə kəsişir. Yol üzərində iki metro stansiyası ("Əhmədli" və "Həzi Aslanov") və bir neçə istiqamətdən gələn yolların kəsişdiyi 1 böyük dairə (Ukrayna dairəsi) yerləşir. Bu səbəbdən Məhəmməd Hadi küçəsi Xətai rayonunun mühüm nəqliyyat arteriyası hesab olunur.

Küçə uzun illər istismar olunduğundan yolun hərəkət hissəsində çökmələr, sürüşmə xarakterli deformasiyalar əmələ gəlmişdi və buna görə əsaslı təmirə ehtiyac var idi. Bu isə öz növbəsində, hərəkətdə müəyyən problemlərə səbəb olurdu. Məhz bütün bunlar nəzərə alınaraq Dövlət Agentliyi tərəfindən prospektin əsaslı şəkildə yenidən qurulması işlərinə başlanılıb.

Artıq küçənin təqribən 2800 m-lik hissəsində təmir-tikinti işləri tam olaraq yekunlaşdırılıb. Sözügedən hissədə 50 min kv.m-dən çox mövcud asfalt-beton örtüyü frez maşını ilə profilə salınıb, həmçinin əsas və köməkçi yollarda, səkilərdə hissəvi olaraq yolun deformasiyaya uğramış hissələri 38 min kubmetr həcmdə qazılaraq çıxarılıb, yeni torpaq yatağı və 36 sm hündürlükdə yeni yol əsası inşa edilib. Yolun 278 p.m hissəsində isə kommunikasiya xətlərində aparılan təmir işlərindən sonra yolun əsası yenidən tikilib və asfalt-beton örtüyü bərpa edilib.

Layihəyə uyğun olaraq kanalizasiya quyularının yenidən qurulması, 14 ədəd yeni quyu qapaqlarının quraşdırılması, həmçinin səth sularının kənarlaşdırılması üçün 150 mm diametrində 110 p.m uzunluğunda drenaj boruların çəkilməsi və 14 ədəd yağış barmaqlıqlarının quraşdırılması işləri də görülüb.

Bundan başqa, təmir-tikinti işləri çərçivəsində müxtəlif hərəkət istiqamətləri arasında yeni ayrıcı zolaq inşa edilib, kənarlarına 5500 p.m yeni səki daşı düzülüb və 736 kv.m bəzək daşı döşənib. Yolun işıqlandırılması üçün ayrıcı zolaqda 61 ədəd yeni işıq dirəyi quraşdırılıb. Vətəndaşların yolun kənarı ilə rahat və təhlükəsiz hərəkətini təmin etmək məqsədilə 4 min kv.m sahədə yeni səki inşa edilib, kənarlarına isə 6500 p.m yeni səki daşları düzülüb.

Tikinti norma və standartlarına uyğun olaraq Azərbaycan Avtomobil Yolları Dövlət Agentliyinin rəhbərliyinin birbaşa nəzarəti altında təmir işləri yekunlaşdırılmış ərazidə əsas və köməkçi yollara 63 min kv.m sahəyə 2 laydan ibarət iri və xırda dənəli asfat-beton örtüyü döşənib, yol boyu zəruri yol nişanları və məlumatverici lövhələr quraşdırılıb, yolun üfiqi nişanlanma xətlərinin çəkilişi işləri aparılıb.

Hazırda küçənin kəsişdiyi “Ukrayna dairəsi”ndə təmir-tikinti işləri aparılır. Bu hissədə işlər lazımi sayda qüvvə cəlb olunmaqla yüksək keyfiyyətlə və sürətlə davam etdirilir. Dairədə asfalt-beton örtüyünün qabarması və deformasiyaya məruz qalması hərəkətdə çətiniklər yaradırdı. Atıq dairənin bir hissəsində köhnə asfalt-beton örtüyü frezlənərək kənara daşınıb, 7500 kv.m sahədə qabarmış və dağılmış hissələr qazılaraq çıxarılıb, əks-dolğu aparılaraq profilə salınması üçün həmin hissələr asfaltlanıb. Bunun ardınca asfaltlanma işlərinə başlanılıb. Yaxın günlərdə bu işlər yekunlaşan kimi dairənin digər hissəsində işlərə başlanılacaq. Dairənin 28 min kv.m sahəsinə 2 laydan ibarət yeni asfalt-beton örtüyü döşənir.

Ümumilikdə Məhəmməd Hadi küçəsinin yenidən qurulması layihəsi çərçivəsində küçə boyu 130 min kv.m-dən çox sahədə tam yeni və müasir yol infrastrukturu yaradılır. Layihəyə uyğun olaraq küçə boyu köhnə asfalt-beton örtüyü frezlənərək kənara daşınır, zəruri yeraltı kommunikasiya xətləri yenilənir və ya yolun hərəkət hissəsindən kənara çıxarılır, səth sularının kənarlaşdırılması üçün zəruri olan yerlərdə yeni yağış-kanalizasiya sistemi yaradılır, mövcud sistem isə bərpa olunaraq işlək vəziyyətə salınır. Aparılan işlər zamanı kommunikasiya xətlərinin dəmir-beton plitələri qaldırılaraq 84 ədəd yeni baxış qapaqları qoyulacaq, səth sularının axıdılması üçün isə 57 nöqtədə yağış barmaqlıqları quraşdırılacaq.

Bundan başqa, küçə boyu yeni piyada səkiləri inşa edilir və mövcud səkilər bərpa olunaraq asfaltlanır, kənarlarına yeni səki daşları düzülür. Ümumilikdə səkilərin kənarlarına 22 min paqon-metrdən artıq yeni səki daşının düzülməsi nəzərdə tutulub. Həmçinin küçəni iki hərəkət istiqamətinə ayırmaq üçün 1 metr enində ayrıcı zolaq inşa edilir. Sutkanın qaranlıq saatlarında küçəni işıqlandırmaqla təhlükəsiz hərəkətin təşkili üçün ayrıcı zolaqda yeni işıq dirəkləri quraşdırılır.

Tikinti layhəsinə uyğun olaraq küçəyə 2 laydan ibarət yeni asfalt-beton örtük döşənir. Asfaltlanma işləri 135 min kv.m sahəni əhatə edəcək. Həmçinin avtobusların ümumi hərəkətə maneə yaratmadan dayanacaqlara giriş-çıxışını təmin etmək məqsədilə Məhəmməd Hadi küçəsi boyunca 27 ədəd xüsusi “cib”li dayanacaqların yaradılması, 70 ədəd zəruri yol nişanının quraşdırılması və üfüqi nişanlanma xətlərinin çəkilməsi də layihədə nəzərdə tutulan işlərdəndir.

Yenidənqurma işlərinin yaxın müddət ərzində yekunlaşdırılması nəzərdə tutulub.

 

17.07.2018 11:45 / Baxılıb: 256 / Çap
 
Bu bölmədə
 Xəbər lenti
21.08.2018
20.08.2018
 
2018 All right reserved www.azadinform.az Powered by Danneo