Diasporda canlanma: Avropadakı aktiv təşkilatlar birgə addımlayacaq

AZADİNFORM. Almaniyanın Nürnberg şəhərində fəaliyyət göstərən "Baku-Nürnberg" Mədəniyyət və Təhsil Mərkəzi ilə Ukrayna Azərbaycanlıları Birləşmiş Diasporu (UABD) birgə əməkdaşlıq haqqında Memorandum imzalayıblar. Azadinform xəbər verir ki, sənədi "Baku-Nürnberg" Mədəniyyət və Təhsil Mərkəzinin sədri, texniki elmlər doktoru Yaşar Musayev və onun müavini Mirhüseyn Cəlilov, Ukrayna tərəfdən isə UABD-nin sədr müavini Murad Cəfərov imzalayıblar.  

İmzalanma mərasimində çıxış edən "Baku-Nürnberg" Mədəniyyət və Təhsil Mərkəzinin sədri Dr. Yaşar Musayev bildirib ki, Memorandumu imzalayan tərəf kimi diaspor hərəkatının inkişafına töhfə verəcək konkret işlərin görülməsi, soydaşlarımızın daha sıx birliyinə nail olmağı əsas hədəf seçiblər.

"Baku-Nürnberg" Mədəniyyət və Təhsil Mərkəzinin sədr müavini Mirhüseyn Cəlilov Ukraynada fəaliyyət göstərən ən güclü Azərbaycanın diaspor təşkilatı ilə vahid koordinasiya və qarşılıqlı dəstək, anlaşmanın yaranması üçün birgə müzakirələr aparacaqlarını bildirib. 

UABD-nin sədr müavini Murad Cəfərov isə Azərbaycanın haqlı mövqeyini dünya ictimaiyyətinə çatdırmaq, ictimai fikri ölkəmizin xeyrinə dəyişmək, xarici media qurumları ilə ümumi işi gücləndirmək, hazırda çox məhdud olan xarici mediaya çıxış imkanlarımızı genişləndirmək üçün mövcud olan kadr və texniki potensialdan birgə istifadə edəcəklərini bəyan edib: “Dünyada yaşayan azərbaycanlılardan ibarət çevik qüvvələri daha operativ koordinasiya etməklə ümumi məqsədə qısa zamanda nail olmaq istiqamətində birgə müvafiq tədbirlər görəcəyik”. 

Qeyd edək ki, belə bir Memorandum UABD və İsveç Azərbaycanlıları Konqresi arasında imzalanıb. 

Xatırladaq ki, mayın 11-12-də Almaniyanın Nürnberg şəhərində “ADR-in 100 illik” və “Almanların Azərbaycana köç etmələrinin 200 illik” ildönümü münasibətilə tədbir keçirilib. Bavariya əyalətinin tarixi yerlərindən sayılan əzəmətli Vətən və Maliyyə Nazirliyinin binasında baş tutan iki günlük tədbir Nürnberg şəhərində fəaliyyət göstərən "Baku-Nürnberg" Mədəniyyət və Təhsil Mərkəzi ilə "Haus der Heimat" Alman Təşkilatının təşəbbüsü ilə gerçəkləşib.

15.05.2018 11:45 / Baxılıb: 606 / Çap
 
    Bu bölmədə
     Xəbər lenti
    16.10.2018
    15.10.2018
     
    2018 All right reserved www.azadinform.az Powered by Danneo