Zərdabda yem emalı müəssisəsi və tibb məntəqəsi istifadəyə verildi

Eşqin Nuruşov/AZADİNFORM. Azərbaycan hökuməti və ABŞ-ın Beynəlxalq İnkişaf Agentliyi tərəfindən birgə maliyyələşdirilən "Sosial-iqtisadi inkişaf fəaliyyəti" layihəsi (SEDA) çərçivəsində Zərdab rayonunun Hüseynxanlı icmasında yem emalı müəssisəsi və Əlibəyli icmasında tibb məntəqəsi fəaliyyətə başlayıb.

İqtisadiyyat Nazirliyindən Azadinform-a verilən məlumata görə, tədbirlərdə nazirliyin, ABŞ-ın Beynəlxalq İnkişaf Agentliyinin, yerli icra hakimiyyətinin nümayəndələri və sakinlər iştirak ediblər.

Tədbirdə çıxış edən İqtisadiyyat Nazirliyinin Regionların inkişafı və dövlət proqramları şöbəsinin müdir müavini Emil Qasımov Azərbaycan prezidentinin sosial-iqtisadi siyasətinə uyğun olaraq, regionların sosial-iqtisadi inkişafı dövlət proqramları çərçivəsində geniş quruculuq-abadlıq işlərinin aparıldığını, ölkənin şəhər və rayonlarında minlərlə yeni müəssisələrin yaradıldığını, yeni iş yerlərinin açıldığını vurğulayıb, bölgələrdə sahibkarlıq fəaliyyətinin genişləndirilməsi üçün sistemli tədbirlərin həyata keçirdiyini diqqətə çatdırıb. E. Qasımov icma əsaslı biznesyönümlü layihələrin icrasının kəndlərdə məşğulluğun təmin olunmasında, rayonun sosial-iqtisadi inkişafı sahəsində əhəmiyyətini qeyd edib.

Zərdab rayon İcra Hakimiyyəti başçısının müavini Pərvin Mahmudova regionların sosial-iqtisadi inkişafı dövlət proqramları çərçivəsində rayonda reallaşdırılan layihələr, görülən işlər barədə məlumat verib, yeni yem emalı müəssisəsinin istifadəyə verilməsinin kənd sakinlərinin heyvandarlıq və bitkiçilik sahəsində fəaliyyətinin genişlənməsinə şərait yaradacağını, tibb məntəqəsinin açılmasının kənd əhalisinin tibb xidmətlərinə olan tələbatının daha dolğun ödənilməsində önəmini vurğulayıb.

ABŞ-ın Azərbaycandakı fövqəladə və səlahiyyətli səfirliyinin nümayəndəsi Stefan Stonhaus, “Sosial-iqtisadi inkişaf fəaliyyəti” layihəsinin əməkdaşı Əhməd Məmmədzadə layihə çərçivəsində görülən işlərdən danışıb, bu tədbirlərin Azərbaycanın regionlarının inkişafına töhfə olduğunu bildirib.

Tədbirdə diqqətə çatdırılıb ki, Zərdab rayonunun Hüseynxanlı kəndində yem emalı müəssisəsinin inşasında əsas məqsəd kənd əhalisinin məşğulluğunu təmin etmək, heyvandarlığı inkişaf etdirməkdir. Layihə çərçivəsində yem emalı avadanlıqları üçün otaq və anbar inşa olunmuş, hər birinin gücü saatda 1,5 ton olan toxumtəmizləyən, yemüyüdən və ot doğrayan avadanlıqlar quraşdırılmışdır. Burada 5 nəfərin işlə təmin edilməsi nəzərdə tutulur.

Zərdab rayonunun Əlibəyli icmasında tibb məntəqəsinin inşası isə əhalinin keyfiyyətli tibb xidməti ilə təminatının yaxşılaşdırılması məqsədini daşıyır. 4 ixtisaslı kadrın işlə təmin ediləcəyi məntəqə ilkin tibbi yardım, vaksinasiya və digər tibbi xidmətlər üçün avadanlıqlarla təchiz olunub.

11.12.2017 16:53 / Baxılıb: 229 / Çap
 
Bu bölmədə
 Xəbər lenti
20.01.2018
 
2018 All right reserved www.azadinform.az Powered by Danneo