Ermənistanda Aİ-nin sənədi prezident səviyyəsində saxtalaşdırılır

Ləman Hüseynzadə / AZADİNFORM. “Rəsmi dövlət İnformasiya agentliyi “Armenpress” Aİ-nin Brüssel sammitinə 8 gün qalmış Avropa Parlamentinin qətnaməsində açıq mətnlə “Dağlıq Qarabağ xalqının müstəqillik hüququnu tanıması” barədə məlumat yayıb. Hətta bu ilin iyulun 5-də BMT komissiyalarında da “Dağlıq Qarabağ xalqının müstəqillik hüququnu” tanıyan sənədin qəbul olunduğunu bildirib. Hər ikisi ağ yalandır”.

Bu fikirləri Azadinform-a açıqlamasında politoloq Mübariz Əhmədoğlu deyib.

O qeyd edib ki, Dağlıq Qarabağ münaqişəsini tezliklə həll etmək barədə Azərbaycan və Ermənistanı məzmunlu öhdəlik götürməyə vadar etmək Avroparlamentin Avropa Şurasına tövsiyə qətnaməsinin əsas mahiyyətidir: “Eləcə də bu qətnamədə 2009-cu ilin Yenilənmiş Madrid prinsipləri əsas kimi qəbul edilir, ərazi bütövlüyü prinsipi xalqların öz müqəddəratını təyin etmə prinsipindən əvvəldə göstərilir, Aİ-nin Ermənistanla əməkdaşlığı Dağlıq Qarabağ tənzimləməsində əldə olunan irəliləyişlə şərtləndirilir. Qətnamədə göstərilən sosial-iqtisadi inkişafın dayandığı ölkə də Ermənistandır. Ermənilərin sloqana çevirdiyi “A. Kaspişikin missiyasının genişləndirilməsi”, “Təhqiqat mexanizmlərinin yaradılması”, “Prezidentlərin Vyana və Sankt-Peterburq razılaşmalarının yerinə yetirilməsi” frazaları yoxdur”.

“Aİ-nin sənədini saxtalaşdıran təkcə “Armenpress” deyil”, - deyən M. Əhmədoğlu əlavə edib ki, Ermənistanda Aİ-nin sənədi prezident səviyyəsində saxtalaşdırılır: “Prezident S. Sərkisyan Aİ ilə Ermənistan arasında çərçivə sazişində AES-in bağlanması barədə öhdəliyin olmadığını bildirdi. Aİ-nin yaydığı sənəddə isə bu var. Vəziyyətdən çıxış yolu sadədir.

Birincisi, Ermənistan Aİ ilə çərçivə sazişini imzalayarkən Dağlıq Qarabağı tərkib hissəsi etməyəcəyi, müstəqilliyini tanımayacağı və Dağlıq Qarabağın müstəqilliyinin tanınması istiqamətində fəaliyyətini dayandıracağı barədə öhdəlik götürməlidir. Ermənistan AİB-ə  üzv olarkən bu öhdəlikləri götürüb və sonradan bunu verbal nota ilə təsdiqlədi. Aİ AİB-dən zəif qurum deyil.

İkincisi, digər üzv dövlətlər kimi Azərbaycanın ərazi bütövlüyü, sərhəd toxunulmazlığı və dövlət suverenliyi tam dəstəklənməli, Dağlıq Qarabağ məsələsi bu əsasda həll olunmalıdır. Bu məsələnin Brüssel sammitinin Yekun sənədində əksini tapması üçün Aİ ciddi siyasi iradə nümayiş etdirməlidir. Digər tərəfdən Kataloniyanın separatçı rəhbərlərinə qarşı İspaniyanın davranışının Aİ-nin Yekun sənədində presedent və nümunəvi davranış kimi təsbit olunmalıdır. K. Puçdemona nisbətən separatçı Dağlıq Qarabağın de-fakto rəhbərləri olmuş R. Koçaryan, A. Qukasyan və indiki de-fakto rəhbər B. Saakyan daha qatı cinayətkarlardır. Beynəlxalq hüquq normalarını tanımayan bu şəxslər yerli ermənilərə də zülm etmişlər və edirlər. Bu halda Ermənistanın dövlət səviyyəsində Aİ istiqamətindəki yalanlarının qarşısını almaq olar”.

Politoloq vurğulayıb ki, Aİ Ermənistan üzrə işləyən və işləmiş rəsmilərini korrupsiya məsələsinə görə testdən keçirsə, bu, Aİ-nin Cənubi Qafqazda mövqeyini gücləndirə bilər.

20.11.2017 11:55 / Baxılıb: 325 / Çap
 
    Bu bölmədə
     Xəbər lenti
    16.12.2017
    15.12.2017
     
    2017 All right reserved www.azadinform.az Powered by Danneo