Nazarbayev məmurları xarici avtomobillərdən düşürdü

AZADİNFORM. Qazaxıstan prezidenti Nursultan Nazarbayev məmurları «Toyota»lardan düşüb yerli istehsallı avtomobillərə minməyi əmr edib. Bu gün hökumətin iclasında çıxış edən dövlət başçısı sənaye inkişafı proqramı çərçivəsində müəssisələrdə istehsal olunan məhsulların dəstəklənməsinin zəruriliyini bildirib.

«Biz hansı maşınları alırıq? Hamı “Toyota” alır. Onlar bizim istehsal etdiyimiz maşınlarda gəzsələr nə olar? Kim buna nəzarət edir? Onlar əgər onlarda gəzmirlərsə, nəyə görə biz sənayemizi qururuq?» «Azadinform» «İTAR-TASS»-a istinadən xəbər verir ki, prezident yerli maşınların istehsalını dövlət sektoru və milli kompaniyaların hesabına 3-4 dəfə artırmağın mümkünlüyünü deyib. «Kustanay zavodu yaxşı UAZ-lar istehsal edir» - deyə o xatırladıb.
Dövlət başçısı dövlət müəssisələrində çalışanları ixtisar etməyi də tapşırıb. O, dövlət kompaniyalarında süni şəkildə şişirdilən işçi artımından da şikayətlənib. Dövlət başçısı bundan əvvəl xalqa müraciətində isə yeni dünya maliyyə böhranının yaxınlaşması təhlükəsi fonunda büdcə xərclərinin azaldılmasının zəruriliyini bildirib.