Azərbaycanda Üçtərəfli Sosial Şura yaradılıb

Həbibə/AZADİNFORM. Əmək və Əhalinin Sosial Müdafiəsi Nazirliyində sosial tərəfdaşlıq, əməyin mühafizəsi və qiymətləndirilməsi və iş yerlərinin akkreditasiyası mövzusunda sosial tərəfdaşların, beynəlxalq ekspertlərin, müəssisə, idarə və təşkilatların əməyin mühafizəsinə məsul şəxslərin iştirakı ilə konfrans keçirilib.

“Azadinform” xəbər verir ki, konfransda sosial tərəfdaşlar tərəfindən təhlükəsizlik və sağlam əmək şəraiti üzrə Milli üçtərəfli sosial Şuranın yaradılması ilə bağlı qərar qəbul edilib və şuranın əsasnaməsi təsdiq olunub. Şurada Əmək və Əhalinin Sosial Müdafiəsi, Azərbaycan Sahibkarlar və İşəgötürənlər Konfederasiyası və Azərbaycan Həmkarlar Təşkilatları Konfederasiyası təmsil olunur. Şuranın yaradılması haqqında sənədi nazir Füzuli Ələkbərov, HKM sədri Səttar Mehbalıyev və SKM sədri Məmməd Musayev imzalayıb.
Nazir F.Ələkbərov konfransdakı çıxışında bildirib ki, yeni yaradılan şura vətəndaş cəmiyyətləri ilə fəal əməkdaşlıq sahəsində nazirliyin malik olduğu müsbət təcrübənin daha bir uğurlu davamıdır: “2011-ci ilin ortalarından nazirlik yanında ixtisaslaşmış QHT-lərin təmsil olunduğu və tərkibində nazirliyin fəaliyyət istiqamətləri üzrə işçi qrupların formalaşdığı İctimai Şura fəaliyyət göstərir. Ötən müddətdə sosial qanunvericilikdə təkmilləşdirilmə üçün səmərəli təkliflərin hazırlanması, sosial müdafiə tədbirlərinin daha effektli təşkili, vətəndaş müraciətlərinin yerində və obyektiv araşdırılması, yeni aktiv sosial müdafiə tədbiri olan “Özünədəstək” proqramına cəlb ediləcək ailələrin seçilməsi işlərində İctimai Şura tərəfindən mühüm işlər görülüb. İxtisaslaşmış QHT-lərin, uyğun dövlət qurumlarının nümayəndələrinin Sosial Şuraya cəlb edilməsi nəzərdə tutulub”.