Aleksandr Rıbak: “Bakı möhtəşəm bir görünüşə qərq olub”

Adəm Abbaslı/AZADİNFORM. “Azərbaycanlıların qonaqpərvərliyi, insanlarınızın səmimiliyi məni olduqca heyran edir”.

 “Azadinform” xəbər verir ki, bu sözləri jurnalistlərə müsahibəsində “Eurovision” Mahnı Müsabiqəsinin 2009-cu il qalibi Aleksandr Rıbak bildirib. Azərbaycanlıların mənəvi-etik dəyərlərinə hədsiz dərəcədə heyran olduğunu vurğulayan A.Rıbak, özünü bir azərbaycanlı kimi hiss etmək üçün hətta Azərbaycan dilini öyrənmək fikrində olduğunu da bildirib: “Sizin sözün əsl mənasında səmimi və qonaqpərvər bir xalq olduğunuzu duyduğum üçün Azərbaycan dilini öyrənib sizlər kimi danışmaq, sizlər kimi düşünmək istəyirəm. Amma mənə elə gəlir ki, bu çox çətin olar”.
Məşhur ulduz Bakıya bundan əvvəlki gəlişini xatırlayaraq müsbət dərəcədə dəyişikliklərin baş verdiyini də bildirib: “Mən Bakıda 2 il bundan əvvəl olmuşam. Amma bu gün mən Bakıda bir fəqlilik gördüm. Vaxt etibarı ilə 2 ilin inkişaf üçün çox az olmasına baxmayaraq, Bakı möhtəşəm bir görünüşə qərq olub. Müasir binalar və füsünkar Bakı gecələri adamı xüsusilə heyran edir. Mən Azərbaycanı çox sevirəm”.
Xatırladaq ki, Aleksandr Rıbak Azərbaycanın “Eurovision–2012”yə ev sahibliyinin rəsmən qəbul etmə, püşkatma və loqo və sloqanının təqdimetmə marasimində iştirak etmək üçün Bakıya gəlib.