Türkoloq alim Tariximizi öyrənək və öyrədək Gənclər Klubunun üzvləri ilə görüşüb

Eşqin Nuruşov/AZADİNFORM. Azərbaycan Respublikasının Prezidenti yanında Bilik Fondunun "İl boyu bilik" proqramına uyğun olaraq, Azərbaycan Dövlət Pedaqoji Universitetinin nəzdində Azərbaycan Dövlət Pedaqoji Kollecində filologiya üzrə fəlsəfə doktoru, tarix üzrə elmlər doktoru, AMEA-nın Arxeologiya və Etnoqrafiya İnstitutunun aparıcı elmi işçisi və televiziya aparıcısı Güllü Yoloğlu Fondun “Tariximizi öyrənək və öyrədək” Gənclər Klubunun üzvləri və kollec tələbələri ilə görüşüb. 

Azadinform xəbər verir ki, Bilik Fondunun əməkdaşı Elnarə Əliyeva Gənclər Klubu haqqında məlumat verib, gənc tarixçilərin mühazirə və elmi seminarlarda, müzakirələr və elmi turlarda fəal iştirakı barədə danışıb.

G. Yoloğlu Kollecin müəllim və tələbə kollektivinə “Türk xalqlarının dini görüşləri” mövzusunda mühazirə söyləyib. Türkoloq alim Sibirdən Balkanlaradək olan çoxsaylı səfərlərindən əldə etdiyi faktiki materiallara əsaslanaraq,  bildirib ki, türk xalqları ayrı-ayrı dinlərə və təriqətlərə ayrılsalar da, onları qədim tarixdən və zəngin mədəniyyətdən qaynaqlanan alt qat birləşdirir. G. Yoloğlunun sözlərinə görə, türklərin istər adət-ənənələrində, istər folkloru və inanclarında, istərsə də dünyagörüşündə bir sıra oxşarlıqlar, hətta eyniliklər var.

Türkoloq alim bildirib ki, xalqlar arasında münasibətlərin mədəniyyətlərarası dialoq şəklində qurulması, onların qarşılıqlı hörmət şəraitində yaşaması mədəni inkişafa, sülhə və əmin-amanlığa layiqincə xidmət edər. 

13.10.2017 17:40 / Baxılıb: 58 / Çap
 
Bu bölmədə
 Xəbər lenti
10.12.2017
9.12.2017
 
2017 All right reserved www.azadinform.az Powered by Danneo