Metroda cibgirlik edən dəstə saxlanılıb Fotolar

Samir Soltanov/AZADİNFORM. Bakı metrosunda cibgirlik edən dəstə zərərsizləşdirilib. 

Daxili İşlər Nazirliyinin mətbuat xidmətindən Azadinform-a verilən məlumata görə, Bakı şəhər sakini Ruhanə Quliyeva metronun “28 May” stansiyasında “Samsung J5” markalı telefonunun oğurlanması ilə bağlı polisə müraciət edib. Həyata keçirilən təxirəsalınmaz tədbirlər nəticəsində hadisəni törətməkdə şübhəli bilinən, əvvəllər Cinayət Məcəlləsinin müxtəlif maddələri ilə məhkumluq həyatı yaşayan, paytaxtın Nizami rayon sakini Kənan İsmayılov saxlanılıb.  Ətrafında aparılmış araşdırmalar zamanı məlum olub K. İsmayılov bu əməli bir neçə nəfərlə həyata keçirib. Videogörüntülərin köməkliyi ilə dəstənin digər üzvləri-əvvəllər Cinayət Məcəlləsinin müxtəlif maddələri ilə məhkum olunmuşlar - Nizami rayon sakini Hikmət Yusubov, Bərdə rayon sakini Fəqan Qafarov və dəstənin başçısı, əvvəllər dəfələrlə məhkumluq həyatı yaşamış, Bərdə rayon sakini Möhübbət Əliyev tutulublar. 

Təqsirləndirilən şəxslərin ətrafında aparılan araşdırmalar zamanı o da məlum olub ki, onlar ötən müddət ərzində Bakı şəhərində müxtəlif cinayətlər törədiblər. 

Metropolitendə Polis Şöbəsinin rəhbərliyi metrodan istifadə edən bütün sərnişinlərə ayıq-sayıq olmağı, əmlaklarına qarşı laqeydlik nümayiş etdirməməyi və hər hansı bir neqativ hal gördükdə, dərhal polisə müraciət etməyi xahiş edir. Şəkillərdəki şəxslərin əməllərindən zərərçəkənlər polisə müraciət edə bilərlər.

9.10.2017 12:26 / Baxılıb: 109 / Çap
 
Bu bölmədə
 Xəbər lenti
18.12.2017
17.12.2017
 
2017 All right reserved www.azadinform.az Powered by Danneo