"Məktəbin həyətində şəhidin barelyefi də qoyulacaq" - Direktor

AZADİNFORM. Şəhid Etibar Əliyevin adının 162 saylı məktəbdən götürülməsi ilə bağlı deyilənlər yalandır. Məktəbimiz öz şəhidi ilə fəxr edir və həmişə də onun adını daşımağa hazırdır.

Azadinform xəbər verir ki, bu sözləri Axar.az-a dünən köklü təmirdən sonra Prezident İlham Əliyevin açılışını etdiyi Səbail rayonunda yerləşən 162-saylı məktəbin direktoru Sevinc Abbasova şəhid Etibar Əliyevin məktəbdə olan büstünün götürülməsi ilə bağlı yayılan xəbərə münasibət bildirərkən deyib. Direktorun sözlərinə görə, məktəb Səbail Rayon İcra Hakimiyyəti tərəfindən tam şəkildə və yüksək səviyyədə təmir edilib: “162 saylı məktəb 100 ildir fəaliyyət göstərir. Məktəbimiz təmir edildi, demək olar ki, sökülüb yenidən tikildi. Ancaq məktəb əvvəldən şəhid Etibar Əliyevin adını daşıyırdı, təmirdən sonra da onun adınadır. Etibar bizim məktəbin şagirdi, məzunu olub. Bizim məktəb üçün şərəfdir ki, belə bir şəhidimiz var və onun adını daşıyır”.

S.Abbasovanın sözlərinə görə, bir neçə aydan sonra məktəbin həyətində şəhid E.Əliyevin barelyefi də qoyulacaq: “2017-ci ilin dekabr ayında məktəbimizin 100 illik yubileyi keçiriləcək. Səbail rayon icra başçısının göstərişi var ki, məktəbin həyətində şəhid Etibar Əliyevin barelyefi qoyulsun. Bunun üçün yer də ayrılıb. Şəxsən mən özüm də şəhidimizin xatirəsinə bulaq çəkdirmək istəyirəm. Bunlar üçün məktəbimizin həyətində artıq yer ayrılıb. Hətta məktəbimizin içərisində də şəhidimiz üçün ayrıca “Bizim Etibar” adlı guşə yaradılıb. Şəhid haqqında o lövhədə olan məqalənin müəllifi mənəm. Təmirdən sonra icra başçısı özü xüsusi tapşırıq verdi ki, şəhidin adına guşə yaradılsın. Biz özümüz də bunu istəyirdik”.

Direktor həmçinin məktəbin adının yazıldığı lövhədə “Şəhid Etibar Əliyev adına” sözlərinin olmamasını da diqqətdə saxlayacağını bildirib.

Qeyd edək ki, sosial şəbəkələrdə təmirdən sonra 162 saylı orta məktəbdə şəhid Etibar Əliyevin büstünün götürüldüyü haqqında məlumat yayılıb. Bildirilir ki, məktəb əvvəllər E.Əliyevin adına olsa da, təmirdən sonra məktəbdən şəhidin adı götürülüb.

 

13.09.2017 09:54 / Baxılıb: 153 / Çap
 
    Bu bölmədə
     Xəbər lenti
    20.11.2017
     
    2017 All right reserved www.azadinform.az Powered by Danneo